Nace #follow20, o festival do Novo Deseño Galego
A Coruña acolle do 9 ao 13 de novembro o mellor do tecido profesional galego en materia de deseño cun programa online e presencial.
O festival ten un compromiso 100% Carbon Neutral, alimentará a instalación física cun xerador solar e compensará calquera pegada medioambiental.
#follow20 é unha edición 0 que dará paso en xuño de 2021 á primeira Galicia Design Week, semana do deseño dentro do circuíto de citas internacionais de Barcelona, Londres, Nova York ou México.
A Coruña, 6 de novembro do 2020
O vindeiro luns 9 de novembro arrinca na Coruña o festival de deseño galego #follow20, un novo proxecto que aúna o máis destacado do tecido profesional galego nesta materia. Será unha semana de eventos online e presenciais que buscan favorecer a conexión co exterior e o achegamento ao gran público. Até o venres 13 de novembro o festival acollerá de xeito online a través da súa web unha completa programación artellada en catro seccións, cuxos contidos permanecerán unha vez terminado:
Stories, con microdocumentais de deseñadoras e deseñadores galegos; Conversas, con charlas temáticas entre creativas e creativos galegos; Showroom, un escaparate dixital de creacións e espazos de deseño galegos; e Creative Camp, sección a través da que se fará unha revisión dixital de portfolios dirixida a estudantes e novos profesionais.
Entre os convidados e convidadas das Stories desta edición atópanse a directora de arte Lucía García Rey; a marca de moda infantil The Campamento; a ceramista Verónica Moar; a axencia de branding Costa; a axencia tipográfica NM Type; o deseñador gráfico de orixe italiana Marco Oggian e o seu colectivo Flaco; o estudio de deseño DARDO e a súa Fundación DIDAC; o deseñador de iluminación Arturo Álvarez; e o estudio de arquitectura Castroferro.
A sección Conversas, dedicadas á industria, á estratexia e á comunicación do deseño, contará con Dani Bembibre, director de Costa; o deseñador de mobiliario Isaac Piñeiro; Lola Dopico, directora da escola de moda ESDEMGA; a deseñadora de servizos Coca Rivas; Nuria Carballo, directora da axencia creativa Unconventional; a arquitecta Patricia Muñiz, socia do estudio MMASA; o infografista Artur Galocha; o tipógrafo Marcos Dopico; e a deseñadora gráfica Uqui Permui.
Exposición do panorama galego e creacións en vivo
O festival #follow20 acollerá tamén unha serie de eventos presenciais paralelos (Showcase). O programa dixital compleméntase coa exposición física #novodeseñogalego na Praza de Lugo da Coruña, onde veranse traballos das Yarza Twins, deseñadoras viguesas afincadas en Londres e reciente Premio Nacional de Diseño, o tamén de NM Type, premiada nos European Design Awards. E estará acompañada dunha carpa pola que pasarán diferentes deseñadoras e deseñadores para crear obras en vivo.
Trátase dunha edición 0 porque este estraño ano serve de lanzamento dun ambicioso proxecto, que terá continuidade o próximo xuño coa primeira edición da Galicia Design Week dentro de #follow21, unha semana dedicada ao deseño en Galicia dentro do circuíto de citas internacionais celebradas en lugares como Barcelona, Londres, Nova York ou México.
A greener festival: compromiso coa sustentabilidade
#follow20 é totalmente neutro en carbono, un compromiso ineludible coa sustentabilidade. A organización do evento calculará a súa pegada de carbono ao final do festival e para compensala mediante achegas económicas a proxectos galegos sostibles. Precisamente para mitigar esa pegada, a carpa física estará alimentada por un xerador solar; os carteis que xa se ven pola cidade están feitos de papel reciclado, os flyers dun papel fabricado con refugallos de algodón e sementes de tomate, que permite plantalos durante a primavera; e tanto a propia carpa como os módulos expositivos serán reutilizados en sucesivas edicións do festival. Todo iso co asesoramento da prestixiosa ONG británica A Greener Festival.
Un prestixioso consello asesor
#follow20 conta cun consello asesor formado por catro profesionais galegos de referencia: David Barro, codirector do estudo de deseño DARDO e director da Fundación DIDAC; Nuria Carballo, directora da axencia creativa Unconventional; Dani Bembibre, director da axencia de branding Costa; e Lola Dopico, directora da escola de moda ESDEMGA.
A promotora do festival é a axencia visual e creativa coruñesa Follow e conta co patrocinio da Xunta de Galicia a través do programa O teu Xacobeo do Xacobeo 2021 e coa colaboración da área de Innovación, Emprego e Comercio do Concello da Coruña, da súa axencia irmá de branding e estratexia Urbanlab, do colectivo Flaco, da madeireira Finsa, da empresa de tecnoloxía visual Sinala e da imprenta Verde.
Marga Toxo
629 860 437
marga@nocomun.com
Andrea Villa
667683551
andrea@nocomun.com
Alex Rico
Director de #follow20, Follow y Urbanlab
645 888 210
alex@follow.gal
